Охрид, 7. мај 2025 (ИНПРЕС) – Водостојот на Охридското Езеро и понатаму е под просекот за овој период од годината.

Подолг период хидролошката состојба во континуитет бележи подобрување, но тоа не е доволно нивото да го достигне просекот за мај.

Според денешните мерења на Управата за хидрометеоролошки работи на Република Македонија (УХМР) водостојот е на кота од 693,39 м.н.в што е за 26 сантиметри под просекот за овој месец (693,65 м.н.в) и 29 сантиметри над минимално дозволената кота (693,10 м.н.в). Температурата на езерската вода, измерена утрово е 13 степени и е за 2 степени пониска од просечната.

Со надеж дека одговорните ќе преземат соодветни мерки и нема да ни се случи „Преспанизација“ на Охридското Езеро, на OhridPress продолжува рубриката „До кај сме“ каде секој ден објавуваме по една фотографија од истата локација од процесот на претворање на охридското „Островче“ во полуостров.

Во Охрид денес променливо облачно и нестабилно време со услови за локален дожд. Ќе дува слаб до умерен ветер од југоисточен правец. Максималната температура ќе се искачи до 21. степени.

– Под влијание на влажна и нестабилна воздушна маса во текот на оваа седмица времето ќе биде променливо облачно и нестабилно со честа појава на локални врнежи од дожд и грмежи. Денеска наместа процесите ќе бидат поинтензивни во форма на невреме со пообилен пороен дожд (за кратко време поголема количина), грмежи, силен ветер (над 60 km/h) и изолирана појава на град. Во четврток во западните делови ќе дува засилен ветер од југозападен правец, информираат од УХМР. (Крај)

извор: ИнПрес фото: ИнПрес/УХМР