Охрид, 10. ноември 2025 (ИНПРЕС) – За една недела, во периодот од 3-ти до 9-ти ноември во Република Македонија се пријавени 116 случаи на групни пријави за заболени од грип – заболувања слични на грип, 23,4% повеќе во споредба со минатата недела се наведува во најновиот извештај на Институтот за јавно здравје (ИЈЗ).

Од нив 86 лица се на возраст од 15-64 години, 16 лица на возраст над 65 години, 9 деца на возраст од 5-14 години и 5 случаи на возраст од 0-4 години.

– Заболените лица оваа недела се регистрирани во Куманово – 46, Гостивар -34, Штип – 10, Тетово – 8, Крушево – 6, Струмица – 4, Неготино – 3, Радовиш – 2 и по еден случај во Скопје, Кавадарци и Свети Николе. Пријавената инциденца е под неделната граница на сезонската активност на вирусот на грип, односно сѐ уште не е достигнат прагот на влез во сезоната на грип, стои во извештајот.

Во сезоната 2025/2026 вкупниот број на случаи на грип/заболувања слични на грип изнесува 454. Во споредба со истиот период од минатата сезона, бројот на пријавени случаи е зголемен за 73,3%.

Од 16-ти октомври започна да се спроведува бесплатната вакцинација против сезонски грип за ризичните групи граѓани, а интересот е голем. Досега на ниво на Република Македонија со бесплатна вакцина се имунизирани вкупно 66.987 лица од ризичните категории. Покрај тоа набавени се и 2.400 дози комерцијални вакцини за останатото население и досега се имунизирани 1.033 лица.

Вакцинацијата против сезонски грип е најефикасна мерка за превенција на грип, која спречува појава на потешки форми, компликации и смртен исход особено кај ризичните групи. (Крај)

извор: ИнПрес фото: архива