Охрид, 29. октомври 2025 (ИНПРЕС) – Планот за управување со отпад во сите општини предвидува мапирање и чистење на дивите депонии.
Во обид да се помогне реализацијата на овој процес во Охрид, Иницијативата „Збогум Буково” започна со собирање на информации за местоположбата на овие ѓубришта и нивно пријавување до надлежниот сектор во општината со цел расчистување и превенирање на повторно нелегално фрлање на отпад.
– Нашите активисти соработуваат со организации што се обидуваат да ги помогнат овие активности како на локално така и на национално ниво. Овие обиди се пресретнати со нефункционалноста дури и недостатокот на јасни процеси за спроведување на информацијата, постапување по барањата и преземањето одговорност од страна на надлежните. Ги повикуваме сите граѓани на Охрид и охридските села да пријавуваат диви ѓубришта. Доколку имате можност пуштете ни и слики и точна локација, велат од „Збогум Буково“.
Покрај тоа ги повикаа и надлежните инспекциски служби да обезбедат непречен тек на процесот на мапирање и чистење на дивите ѓубришта со помагање на активностите што ќе овозможат коректно спроведување на барањата на граѓаните и заедно со сите надлежни институции гонење на сите кои постапуваат спротивно од Законот. (Крај)
извор: ИнПрес фото: „Збогум Буково“
