Охрид, 25. јуни 2025 (ИНПРЕС) – Над 200 сорти вино на околу 25 винарии, рибни специјалитети и македонска музика ќе понуди четвртото издание на Оhrid Wine Festival што започнува утре.
Овој фестивал веќе станува препознатлив белег на нашата туристичка понуда. И оваа година ќе понуди вистинско уживање на брегот на Охридското Езеро – со дегустација на најдобрите македонски вина, богата музичка програма и весела атмосфера, пред самиот старт на летната сезона во Охрид, изјави градоначалникот на Охрид, Кирил Пецаков.
– И оваа година се погриживме музичката програма да биде исполнета исклучиво со настапи на македонски естрадни ѕвезди – кои ќе приредат незаборавна забава. Утревечер, на отварањето на фестивалот на сцената ќе настапат DJ Gec, Backdoor band, Тамара и Brass brothers.Вториот фестивалски ден, петок е резервиран за „Куку Леле“, Дац и Александар, „Пауза за ракија“, DJ Nasti и Urban planet. Во сабота за забавата ќе бидат задолжени „Ареа“ и Влатко Лозановски, „Kамелеон“ и DJ Jana. Бидете дел од фестивалот, да го споделиме заедничкото уживање и уште еднаш да покажеме зошто Охрид е синоним за традиција и гостопримство, рече Пецаков.
На годинашното фестивалско издание ќе бидат промовирани неколку нови врсти на вино од нашите винарии што ќе може да се дегустираат, а ќе се дружиме со наши артисти и наша музика. Учествуваат околу 25 винарии, кои ќе понудат над 200 сорти вино, а годинава ќе имаме и рибни специјалитети, истакна Пане Темов, дел од организациониот тим.
– Четврта година од една успешна приказна во Охрид, граѓаните покажаа дека го сакаат виното и музиката, а туристите уживаат нашите нови брендови. Секоја година се трудиме да донесеме некои нови винарии, годинава е тука Монтеко, а имаме увозници на шпанско вино, вели Темов.
Подвлече дека на вој вид настани вината се по промотивни цени, а винариите учествуваат исклучиво за промоција, не за профит, меѓутоа промоцијата е голема, па ќе имаат бенефит понатаму.
Ohrid Wine Fest ќе се одржува на кеј „Македонија“, пред поранешниот хотел „Палас“, а програмата започнува од 20:00 часот. (Крај)
извор: ИнПрес фото: ИнПрес
