Охрид, 3. јули 2025 (ИНПРЕС) – Младиот охриѓанец Лазар Топаловски од четири годишна возраст тренира фудбал во охридски клубови, а за неговите вештини со топката интерес покажаа и од Црвена Ѕвезда.

Лазар сега има 9 години и игра во охридскиот ФК „Еврофудбал“, генерација 2016. Има учествувано на бројни турнири, а неговиот тренажен процес се одвива под будното око на тренерите Филип и Љупчо.

Минатата година првпат беше поканет и учествуваше на кампот на ФК „Црвена ѕвезда“, можност и задоволство што го имаше и оваа година. Кампот заврши неодамна, а Лазар го доби признанието МВП во неговата возрасна категорија.

Лазар досега има играно неколку пријателски натпревари во дресот на црвенo – белите, генерација 2016, но и 2015 година, предводени од Ненад Петровиќ. Од српскиот клуб во континуитет ќе ја следат играта и напредокот на охридската фудбалска надеж додека наполни 12 години, по што ќе може да одлучи дали ќе потпише и официјален договор со нив.

Веќе во септември Лазар повторно ќе оди во Белград, каде во период од 15 дена ќе тренира со Црвена Ѕвезда. (Крај)

извор: ИнПрес фото: архива