Скопје, 2. април 2025 (ИНПРЕС) – Од денеска, Скопје и официјално директно се поврзува со Париз преку новата авиолинија Скопје – Париз.
Утрово на Меѓународниот аеродром Скопје се реализираше првиот лет од Париз и тоа од аеродромот Орли до Скопје на авиокомпанијата easyJet, информира министерот за транспорт Александар Николоски.
– Ова е уште една можност за подобра комуникација и поврзување на Македонија со европските земји и европските метрополи. Како Влада создаваме услови со кои привлековме нови авиокомпании во Македонија и резултатите веќе се видливи, вели Николоски.
– Патниците од Македонија сега имаат полесен пристап до Париз и понатаму во Европа, додека патниците кои од Париз ќе слетуваат во Македонија ќе имаат можност да ги истражуваат богатата историја, прекрасните пејзажи и живописната култура на земјава, велат од ТАВ Македонија.
На оваа релација ќе се лета два пати неделно, во среда и сабота и истата е воведена како резултат на финансиската поддршка што ја овозможи Владата преку Министерството за транспорт преку Програмата за воведување на нови дестинации. (Крај)
извор: ИнПрес фото: архива
