Охрид, 1. август 2025 (ИНПРЕС) – Утре, на големиот празник Илинден, во селото Елшани, ќе се одржи 11-тото издание на културната манифестација „Илинденска вечер во Елшани“.
– Настанот, кој во изминатата деценија прерасна во симбол на заедништво, традиција и празничен дух, и оваа година нуди програма што го спојува културното наследство со современиот музички израз. Со почеток од 21:00 часот, посетителите ќе можат да уживаат во фолклорни изведби што ќе ги доловат корените на македонската народна песна и оро, особено од охридскиот регион. Од 22:00 часот, атмосферата ќе ја оживеат популарните Туше и Татијана Стефаноска, кои ќе настапат со нивни авторски композиции и омилени македонски народни песни, потенцираат организаторите.
Велат манифестацијата има за цел „да го позиционира Елшани на културната и туристичката мапа на Охрид и пошироко, претставувајќи го како современа, но автентична дестинација за одмор, блиска до градот, а богата со дух и традиција“.
– Името „Илинденска вечер“ не е случајно, настанот го спојува историскиот контекст на двата Илиндена (1903 и 1944), со духовната димензија на празникот посветен на Свети пророк Илија – заштитникот на селото. Настанот е отворен за сите: млади и постари, локални жители и гости, љубители на културата, традицијата и добрата музика, потенцираат од организациониот одбор. (Крај)
извор: ИнПрес фото: архива
