Охрид, 29. јули 2025 (ИНПРЕС) – Со проекции на над 60 современи европски филмови, мастер-класови, дискусии и жив фестивалски дух покрај езерото, заврши осмото издание на фестивалот на нов европски филм Beach Film Festival што се одржа во Охрид.
Ова издание беше посебно и по хуманитарниот карактер, сите средства од продажба на билети ќе бидат донирани за погодените семејства и повредените од трагедијата во Кочани.
Програмата се одвиваше на четири локации низ Охрид, на плажите Славија и Сараиште, брод „Армада“ и Младинскиот центар.
На свеченото затворање, жири-комисијата во состав Хуан Албарацин (режисер, сценарист), Патрик Бихтинг (режисер, продуцент), Танасис Неофотистос (режисер, писател) и Нејтан Силвер (режисер), ја додели наградата за најдобар долгометражен филм на македонско-грчката продукција „Киука – пред летото да заврши“, во режија на Костис Харамуданис.
Наградата за најдобро актерско остварување ја доби полската актерка Нел Качмарек за улогата во филмот „Губење рамнотежа“ („Loss of Balance“), додека наградата за најдобар краткометражен филм беше поделена меѓу два филма – „Мала шега“, во режија на Трифун Ситниковски и „Зајак“, во режија на Ханис Багашов.
Студентската селекција, за првпат оваа година, беше оценувана од младо жири составено од Иво Георгиески, Агнес Лахтова и Димитриј Мартиновски. Наградата за најдобар студентски филм ја доби норвешкиот „Чекање“ („The Wait“), во режија на Вилја Кескимаки.
Во рамки на фестивалот беа одржани четири мастер-класови со членовите на жирито, како и панел-дискусија на тема „Филмот како образовна алатка во училишта и при работа со млади“. Атмосферата секоја вечер беше збогатена со музичка програма на плажа Славија. (Крај)
извор: ИнПрес фото: архива
