Во Бугарија започна судскиот процес преку кој роднините на загинатите во бродот „Илинден“ бараат 5,2 милиони евра отштета

Софија, 28. ноември 2014 (ИНПРЕС) – Во Софискиот окружен суд вчера почна судски процес по граѓанска тужба во врска со потонувањето на бродот „Илинден“ во Охридското Езеро во септември 2009 година, при што загинаа 15 бугарски државјани.

Со тужбата роднини на загинатите бараат над 5,2 милиони евра отштета од осигурителните компании „Алианц Ферзихерунг“ и „Германишер Лојд“. Тие, како што јави БТА, во тужбата наведуваат дека причина за потонувањето на бродот се извршените промени во структурата на „Илинден“, по што осигурителните компании оцениле дека бродот е безбеден.

Во текот на вчерашната судска расправа беа сослушани 14 сведоци, роднини и блиски на загинатите, кои изнесоа детали за трагедијата.

Судот на двете страни во спорот им даде рок од 20 дена да се запознаат со доказите во процесот, како и да бидат прибавени дополнителни информации за техничката експертиза за случајот.

Во врска со потонувањето на бродот, со кој над 50 бугарски туристи патуваа од Охрид до Свети Наум, во Макеоднија веќе се осудени сопственикот и капетан на „Илинден“, Сотир Филевски и техничкиот експерт Бранко Баиќ.

За време на несреќата на бродот имало 53 патници, иако тој имал капацитет за 35 лица. (Крај)

извор: Плус Инфо фото: архива