Загреб, 23.јули 2015 (ИНПРЕС) – Хрватската министерка за надворешни работи и европски прашања Весна Пусиќ соопшти дека ќе има истрага за информациите во медиумите за вршен притисок врз Арбитражниот суд во случајот со спорот со Словенија за Пиранскиот Залив. Таа потенцира дека доколку има вистина во овие информации, тоа ќе биде многу шокантно.

Некои медиуми во Хрватска и Србија се објавија информации дека Хрватска го загубила граничниот спор со Словенија, како и дека Словенците активно лобирале меѓу судиите од Арбитражниот суд да се донесе одлука во нивна корист. Во текстовите се споменуваат вечери со судиите и стенограми од кои може да се заклучи дека Словенија го добила спорот уште во раната фаза од арбитражата.

-Многу сме загрижени од тврдењата кои излегоа во денешните весници. Ако нешто од овие тврдења е точно, тоа би било апсолутно шокантно и драстично ќе ја промени ситуацијата со оваа постапка на арбитража, рече Пусиќ на вонредна прес-конференција.

Влеговме во оваа процедура со доверба во меѓународните правни институции. Влеговме во ова со намера границите и по море, и по копно да се определат исклучиво во согласност со меѓународното право, рече Пусиќ и додаде дека ќе има истрага.

Двете поранешни југословенски републики го водат овој граничен спор уште од прогласувањето на независноста во 1991 година, а се однесува на 13 квадратни километри територија во слабо населен реон и работ на територијалните води во и околу Пиранскиот залив.

Спорот во 2008 година беше причина за забавување на преговорите за приклучување на Хрватска кон Европската унија за 10 месеци. Една година подоцна двете земји склучија арбитражна спогодба со посредништво на ЕУ. (Крај)

извор:Утрински фото:архива