Охрид, 27. декември (ИНПРЕС) – Годината што изминува ќе остане запаметена за Македонската традиционална теквондо федерација.

После 31 година доби решение за дејност спорт, учествуваа на бројни натпревари, а во витрините „го сместија“ и пехарот за најдобра кадетка во Европа, што го освои Христијана Парулеска и е прв пехар во историјата на македонскиот спорт, кога се работи за индивидуални спортови. Теквондистите учествуваа на 10 меѓународни натпревари и освоија рекорден број на медали, 266.

Првиот човек на Македонската традиционална теквондо федерација, Марјанчо Лазаревски повеќе од задоволен од постигнатото.

– 2023 е далеку најуспешна година за македонската традиционална теквондо федерација. После 31 година добивме решение дејност спорт, наша федерација, потоа го организиравме официјално првото државно првенство. Учествувавме на Европско првенство во Јесоло, Италија, Христијана Парулеска се натпреваруваше во две дисциплини освои прво место во борби и второ место во форми. Со два освоени медали и со најдобар резултат доби пехар за најдобра кадетка во Европа што е прв, историски пехар во историјата на македонскиот спорт во индивидуални спортови. Годинава учествувавме на 10 меѓународни натпревари, рекорден број на медали 266 медали, 12 пехари за најдобри поединци. Учествувавме на Светското првенство во Астана, Казахстан, каде Христијана Парулеска го освои бронзениот медал во борби, исто Елена Јанеска и Давид Крстески стигнаа до петто место, бидејќи беа оштетени од страна на судиите. За жал Христијана Парулеска во полуфиналето во форми мораше да ја предаде борбата поради повреда од која сѐ уште се опоравува, инаку несомнено, таков беше впечатокот дека ќе го освои првото место, потенцира Лазаревски.

Тој истакна дека се една од ретките македонски репрезентации каде сите репрезентативци што учествувале на натпревари стигнувале до четвртфинале, односно до позиција за медал.

Најдобрата кадетка во Европа Христијана Парулеска годинава беше наградена и со Повелбата Св.Климент Охридски – Патрон на Охрид и е прва што на 14 години добива вакво признание.

Лазаревски се заблагодари на спонзорот и институциите кои им давааат поддршка на патот кон нивните успеси.

– Сакам да се заблагодарам на генералниот спонзор ПН Метал како најзаслужен за сите наши успеси, успеа од спорт кој едвај преживуваше да направи да прерасне во еден од најдобрите спортови во Македонија и се надеваме да продолжиме понатаму со уште посилно темпо. Благодарност и до Општина Охрид и градоначалникот Кирил Пецаков, како и до Агенцијата за млади и спорт, додаде Лазаревски.

На синоќешната коктел средба МТТФ им оддаде признание и на поддржувачите, а благодарница за медиумската поддршка добија и Супер радио и OhridPress.

Плановите за следната година се учество на Европско првенство и Светски Куп, со надеж дека од овие престижни натпревари ќе се вратат со медали. Секако кон крајот на јуни ќе се организира Mеѓународниот Таеквондо ИТФ натпревар „Охрид Опен 2024“, за кој веќе има најави дека ќе учествуваат голем број натпреварувачи, особено од соседна Грција. (Крај)

извор: ИнПрес фото: ИнПрес