На звуците од операта „Лилјакот“ охридските матуранти ја одиграа матурската парада (Фото/Видео)

Охрид, 19. мај 2023 (ИНПРЕС) – По неколкугодишна пауза охридските матуранти повторно заиграа на звуците на Штраусовата опера „Лилјакот” на Матурската парада 2023 година, испраќајќи ја пораката за ненасилство.

Заедно со нашите матурани, во исто време танцуваа и нивните врсници од неколку македонски градови, но и од градови во Европа.

https://youtu.be/K9jMON7H8uc

За подготовките и сé да изгледа онака како што доликува се погрижи професорката Катерина Стојаноска.
Матурата е важен животен премин, кога мора де се донесат значајни одлуки за идните чекори. Соништата се денешните одговори на утрешните прашања, рече во своето поздравно обраќање градоначалникот на општина Охрид, Кирил Пецаков.

– Успехот не доаѓа кога ќе посакате. Тој доаѓа кога ќе постојат јасни планови, силна желба и постојана упорност. Големиот државник Абрахам Линколн рекол, “Секогаш имајте на ум дека вашата сопствена волја за успех е многу поважна од било што друго.“ Затоа најискрено и од срце ви посакувам секогаш да имате нескротлива волја за ново знаење и мотив да ги истакнете личните квалитети. Верувам дека од вашата генерација ќе произлезат многу успешни професионалци кои ќе дадат голем придонес во идниот развој на Охрид, истакна Пецаков, заблагодарувајќи се и на наставниот кадар вклучен во подготовката на кореографијата, а особено до пензионираната професорка Соња Думбаловска – Делова, која е една од најзаслужните за организирање на оваа меѓународна манифестација во Охрид, низ годините наназад.

Видно возбудени матурантите не го криеа задоволството од одличните подготовки за парадата, а ги кажаа и нивните планови за во иднина.

– Се подготвувавме за оваа парада повеќе од 2 месеци, многу труд беше вложен во подготовка на оваа матурска парада. Им препорачувам на сите деветтоодделенци да се запишат во гимназијата. Понатаму планирам да продолжам на факултет за биохемија или нешто поврзано со хемиските науки, рече гимназијалката Катерина Доневска.

– Се подготвувавме континуирано два месеци континуирано. Благодарност до професорката Катерина Стојаноска што нé подготви одлично. Им препорачувам на сите деветтоодделенци да гопродолжат своето средно образование во гимназијата. Моето образование ќе го продолжам на машински факултет, вели Виктор Миленкоски.

– Подготовките беа многу забавни. Планирам да се запишам на факултет за безбедност во Скопје, изајви матурантот Филип Маркоски

– Имавме одлични подготовки за матурската парада. На факултет планирам да се запишам на ФТУ во Охрид насока осигурување, рече Андреа Макачоска.

Матурската парада е покрената во 2001 година во Словенија, а нејзин идеен творец е Томаж Амброж од танцовата школа „Уршка” во Љубљана.

Танцот “Квадрил” матурантите го играат во четири слики: панталон, ете, пасторел и финале. (Крај)

извор: ИнПрес фото/видео: ИнПрес