Тирана, 14.септември 2015 (ИНПРЕС) – Седиштето на ОБСЕ во Тирана во неделата по повод објавувањето на печатот дека ОБСЕ во еден свој извештај оценува дека во корупцијата и криминалот се замешани и актуелниот премиер Еди Рама, претседателот на Собранието Илир Мета и екс премиерот и екс претседателот на Албанија Сали Бериша, излезе со објаснување дека тоа не е официјален извештај со ставови на ОБСЕ.
Според амбасадорот на ОБСЕ во Албанија Флориан Рауниг објавувањето на документот од албанскиот печат е само обид да се расипат односите на ОБСЕ со албанските институции, како што се Владата и Собранието.
Тој додава дека документот кој е објавен во медиумите во Албанија е само дел на еден Извештај во кој се пренесуваат ставовите на медиумите и јавноста во Албанија, а не е оценка на ОБСЕ.
„Не е вистина дека тоа се ставови на ОБСЕ за криминалот и корупцијата на државните лидери во криминал и корупција“, се наведува во реакцијата на ОБСЕ во Тирана.
Деновиве албанските медиуми дадоа нагласено внимание на информацијата дека ОБСЕ има оценка дека во корупцијата и криминалот се директно замешани премиерот Рама, претседателот на Собранието Мета, но и екс премиерот и претседателот на државата Сали Бериша.(Крај)
извор:Макфакс фото:архива
