Тирана, 21. септември 2014 (ИНПРЕС) – Папата Франциск, кој пристигна во 11-часовна посета на Албанија, го пофали мирниот соживот меѓу сите вери во земјата и посочи дека „никој не треба да ја користи религијата како изговор и оправдување на насилството“.
– Никој да не помисли да го стави Бог како штит, кога планира или врши акти на насилство. Никој да не ја користи религијата како оправдување за сопствените активности кои се во спротивност со достоинството на човекот и основните слободи, рече папата. Според него албанскиот политички систем и соживотот меѓу религиите, може да послужи како образец за многу други земји.
Поглаварот на римокатоличката црква особено го пофали однесувањето на албанските политички и верски водачи.
– Атмосферата на почит и меѓусебна доверба меѓу католиците, православните и муслиманите е драгоцено добро за земјата и има посебно значење во нашата епоха, истакна тој. Според него вистинското религиозно чувство е „изопачено од екстремистичките групи кои ги искривуваат и инструментализираат разликите помеѓу различните вери и ги претвораат во опасен фактор за спротивставување и насилство“. (Крај)
извор: АФП фото: АП