Охрид, 7. јули 2023 (ИНПРЕС) – Заврши четвртиот циклус од обуките за негувател/ки на стари лица и лица со попреченост на Црвен крст Охрид, при што доделени се сертификати на 7 лица, кои во мај и јуни ја следеа обуката.
– Лицата кои ја завршија обуката ќе имаат можност да бидат вклучени во Нега центар при Црвен крст Охрид, социјален сервис кој ја нуди социјалната услуга помош и нега во домот на стари лица над 65 години, лица со намален функционален капацитет и на лица со попреченост на територија на Општина Охрид, велат од охридскиот Црвен крст.
Инаку, од март минатата година во рамки на Црвен крст Охрид официјално започна со работа Нега Центар, кој нуди помош и нега на стари лица и лица со попреченост во домот.
Професионални и сертифицирани негуватели нудат домашна помош и домашна нега, пред сè за постарите граѓани, но и за сите граѓани кои имаат потреба од ваков вид поддршка.
– Нега центарот нуди можност на нашите постари граѓани да живеат независно онаму каде што се чувствуваат најудобно – во своите домови. Ова е единствен провајдер на услуги за помош и нега на стари лица и лица со попреченост во домот на територија на општина Охрид, информираа од Црвен крст Охрид.
Основната цел на Нега центар – Охрид е да го подобри и одржува здравјето на корисникот во неговото семејно опкружување. (Крај)
извор: ИнПрес фото: архива
