Сообраќајна (не)култура на ниво

Охрид, 20. март 2023 (ИНПРЕС) – Ниското ниво на култура на однесување и грижа за добрата и животната средина во повеќе наврати се демонстрира, но истото се случува и со сообраќајната култура.

Секоја чест на исклучоците, но сообраќајната култура, етиката, толеранцијата во сообраќајот, сè уште не се на задоволително ниво.

Она што треба да биде нормално сообраќајно поведение, придржување кон знаците, правилата и прописите се почитува или кога ќе има присуство на полициски службеници или ако за истото се пишуваат казни.

Читатели на InPress до нашата редакција испратија фотографии со непрописно паркирани возила.На оваа тема сме пишувале многу пати, но постојано е актуелна.

Секојдневно низ градот сме сведоци на автомобили поткачени на тротоар, оставени на велосипедска патека, велосипедисти кои возат по коловоз иако имаат обележана велосипедска патека, преминување улица на небезбедни места, прескокнување граничници на кружните текови…Со зголеменото присуство на полициските службеници возачите научија да ги пропуштаат пешаците на пешачките премини, а пешаците во голем дел да префрлаат улица на обележано место, иако рака на срце сé уште има некои кои претрчуваат на пример на булеварот „Туристичка“, кај Шпаркасе банка, иако тука од многу одамна веќе нема пешачки премин.

Ако ова се случува во овој период, можеме само да замислиме што ќе се случува во текот на летото, во шпицот на сезоната, кога неколкукратно ќе биде зголемен бројот на возила и луѓе низ градот. (Крај)

извор: ИнПрес фото: ИнПрес