Загреб, 25.август 2015 (ИНПРЕС) – Група хрватски интелектуалци и свештеници побарале од претседателката Колинда Грабар Китаровиќ усташкиот поздрав „За Дом спремни“ да биде службено вратен на користење во хрватската војска.

Во онлајн петицијата се бара измена на законот за хрватската војска, а ја потпишале наводно повеќе од 3.000 луѓе, меѓу кои академикот Јосип Печаревиќ, поранешниот фудбалер Јосип Шимуниќ, двајца високорангирани свештеници на Католичката црква, академикот Станко Поповиќ и други.

Во Хрватска сѐ почесто и сѐ поагресивно се повикува на усташтво, пишуваат хрватските медиуми. Секогаш истите луѓе упорно ја компромитираат Хрватска, без какви било санкции, иако хрватските закони јасно предвидуваат санкции за тој вид прекршоци.

Поради оживувањето на сеништата од минатото Хрватска сѐ почесто е на столбот на срамот во Европа, а поради дивеењето на Шимуниќ на фудбалскиот терен, кога викаше „За Дом спремни“ хрватската фудбалска организација доби и драстична казна.

Интересно е тоа што петицијата му била испратена и на шефот на опозицијата Томислав Карамарко, претседателот на партијата ХДЗ. Колку тој има врска со промените на законот и таквата иницијативата никому не му е јасно, но може да се очекува дека тој ќе се огради од усташките носталгичари кои упорно ја срамат Хрватска.(Крај)

извор:Инпрес фото:архива