Охрид, 13. февруари 2026 (ИНПРЕС) – Игранките беа многу популарни и посебно доживување за младината, а ние и покрај тоа што немавме музичка наобразба успевавме да им го „погодиме“ ритамот, се присетува на минатите времиња, 60/70 те години на минатиот век, професорот во пензија Љубомир Јакимоски, тапанар во ВИС „Соколи“ од село Долно Лакочереј.
Започнале да свират во дворот на семејната куќа заедно со неговиот брат и уште неколку другари кои биле во училишната музичка секција, а за кратко време станале занчаен фактор за збогатување на културно – забавниот живот во селото.
Во почеток биле пет членови, биле три гитари (соло, бас и ритам), тапани и оргула, а еден соселанец ги носел со своето фиќо по настапи. Она што ќе го заработеле го давале за инструменти, појачала или за превоз, ама за тогашната младина тоа било доживување.
– Имаше во школото музичка секција, брат ми беше член и негови другари, околу 1966 година почнавме со свирење во дворот на нашата куќа и тоа сѐ по слух, немавме музичка подготовка. Потоа се роди желба да свириме на игранки, купивме за почеток гитари, сѐ тоа беше самоиницијативно. Потоа се запрашавме дали може да правиме некои забави во селото и тогаш ни помогна Томе Плевнеш, имаше појачала и така почнавме. Првите игранки беа во селото, тоа беше голем ентузијазам, имаше голема желба за дружба меѓу младите. Потоа се проширивме уште малку, одевме и во околните села Горно Лакочереј, Косел, Оровник, Требеништа, Волино… и бевме пречекувани како Битлси, за тоа поднебје со многу аплаузи. Свиревме тогашна популарна музика – Про Арте, Индекси, Драган Мијалковски… Младината беше многу задоволна, вели Јакимоски во интервју за Супер радио и InPress.
Круна на сето тоа биле настапите во Охрид на Долни Сарај, но и во Струга, на тогашните гитаријади.
– Немавме знаење од музика ама за младината беше важно што се забавуваа, го погодувавме ритамот. Како круна беше настапот во салата во Долно Лакочереј, во една прилика имавме посета од 500 млади, доаѓаа од околните села и им беше како мотив да може да се дружат, можам да кажам дека над 20 – 30 бракови се формирани од тие игранки. Посебен впечаток ми остави настан во Волино, па скоро како со обезбедување пристигнавме, нé поздравуваа со аплауз, истакна Јакимоски.
ВИС „Соколи“ во првичниот состав постоела од 1967 година до 1970/71 година. Групата продолжила со други членови и понатаму да ги забавува младите, да настапува по куќни забави…именувани биле како „Соколи 1“, „Соколи 2“, Соколи 3“…
Производ од овој вокално – инструментален состав се неколку пејачи и инструменталисти, како Ристе Петрески од Лакочереј, кој настапува со група и Аце Костоски кој настапува во групата Цар Самоил на бас. (Крај)
извор: ИнПрес фото: Љубомир Јакимоски
