Охрид, 26. септември 2025 (ИНПРЕС) – Четворицата кандидати за градоначалник на Општина Охрид на престојните локални избори го потпишаа Кодексот за фер и демократски избори.
Претенденти за градоначалничката фотелја на овие локални избори се д-р. Асен Шајн од СДСМ и нивната Коалиција, актуелниот градоначалник, Кирил Пецаков, како кандидат на ВМРО-ДПМНЕ и Коалицијата, Стевче Стевоски како кандидат од Твоја партија и Гоце Цветкоски како независен кандидат.
Државната изборна комисија (ДИК) на јавна седница преку жрепка веќе ја утврди единствената листа на кандидати за градоначалници кои доаѓаат од редовите на парламентарните партии и нивните редни броеви за Локалните избори 2025.
Според утврдениот календар, изборната кампања ќе започне во понеделник, на 29-ти септември и ќе трае до 17-ти октомври.
Граѓаните на 19-ти октомври ќе гласаат за избор на градоначалници и членови на општинските совети, додека евентуалниот втор круг на изборите е закажан за 2-ри ноември. (Крај)
извор: ИнПрес фото: ИнПрес
