Охрид, 22. мај 2025 (ОХРИДПРЕС) – Водостојот на Охридското Езеро и понатаму бележи значителен раст, но недоволно за да го достигне просечното за овој период од годината.
Според денешните мерења на Управата за хидрометеоролошки работи на Република Македонија (УХМР) водат е на кота од 693,45 м.н.в што е за 20 сантиметри под просекот за овој месец (693,65 м.н.в) и 35 сантиметар над минимално дозволената кота (693,10 м.н.в). Температурата на езерската вода, измерена утрово е 15,5 степени, за половина степен повисока од просечната.
Од почетокот на месецов водостојот е покачен за 7 сантиметри.
Со надеж дека одговорните ќе преземат соодветни мерки и нема да ни се случи „Преспанизација“ на Охридското Езеро, на OhridPress со месеци наназад ја објавувавме рубриката „До кај сме“ каде секој ден објавуваме по една фотографија од истата локација од процесот на претворање на охридското „Островче“ во полуостров.
Во Охрид денес променливо облачно време со сончеви периоди. Ќе дува слаб до умерен ветер од југозападен правец. Максималната температура ќе се искачи до 23. степени.
– Денеска ќе има изолирана појава на нестабилност со локален дожд и грмежи, а во петок ќе дува засилен југозападен ветер. Под влијание на нов влажен бран во деновите од викендот ќе има врнежи од дожд, локално во форма на невреме со пообилен дожд (над 30л/м2), проследен со грмежи и засилен ветер. Дневните температури ќе бидат во опаѓање, информираат од Управата за хидрометеоролошки работи на Република Македонија (УХМР). (Крај)
извор: ИнПрес фото: ИнПрес/УХМР
