Охрид, 18. мај 2026 (ИНПРЕС) – Центарот за безбедност на вода при Црвен крст Охрид започна со регрутација на нови кандидати за спасители на вода, кои ќе се грижат за безбедноста на охридските капалишта во текот на летната сезона.
Заинтересираните кандидати треба да се постари од 17 години, да бидат психофизички подготвени, да знаат да пливаат и да достават потврда за здравствена способност за извршување на спортски активности, издадена од матичен лекар.
– Пред почетокот на теоретската и практичната обука, кандидатите ќе подлежат на влезни норми (пливање и нуркање). Обуката ја спроведуваат лиценцирани инструктори за безбедност на вода според меѓународните стандарди на International Life Saving (ILS). Заинтересираните кандидати треба да ги достават потребните документи во просториите на Црвен крст Охрид најдоцна до 15 јуни. За повеќе информации јавете се на телефон 079 350 639, на мејл redcrossohrid@watersafetycentre.mk или на веб страницата watersafetycentre.mk, информираат од Црвен крст Охрид.
Годинашната обука за нови спасители на отвоени води ќе се одржи во периодот од 21 до 28 јуни во Охрид.
Од организацијата потсетуваат дека со станувањето спасител се стекнува меѓународно признат сертификат, динамична работа во текот на летната сезона, како и развивање вештини за прва помош и спасување кои спасуваат животи. (Крај)
извор: ИнПрес фото: архива
