Со капење на рибарите и охридска староградска песна одбележан Денот на рибарите (Фото)

Охрид, 20. јануари 2023 (ИНПРЕС) – Со традиционално капење на рибарите и тајфата на фаќачот на крстот Васко Довлев, на Сараиште, одбележан Денот на рибарите и празникот Свети Јован Крстител во Охрид.

Со чашка греана ракија присутните уживаа во звуците на охридската староградска песна, во изведба на охридскиот музички еснаф.

На денешен ден на Сараиште, старите рибари ги оставале мрежите да се сушат, раскажуваат повозрасните жители на Охрид, кои се сеќаваат на убавите времиња поминати со блиските и пријателите на денот по Богојавление, Ден на рибарите. Велат порано имало многу повеќе риба, а најмногу се ловело околу празникот Св.Никола. Децидни се дека овој настан е од огромно значење за градот, за негување на традицијата.

– Овој ден е значаен за рибарите бидејќи на овој ден се фрлал крстот, на Водици било забрането, па го поместиле еден ден подоцна. Важно е да се негува оваа традиција и вчера имаше многу луѓе и покрај тоа што времето неповолно, ама луѓето си дојдоа. Јас сум од Љубаништа, порано имаше многу повеќе риба, сега се ловат плашици, грунци, покрупна риба нема. Се ловеше со мрежи, најголема риба што сум уловил е крап, околу 2,5 килограми.Обично се ловеше за Свети Никола. Најплодни години, пред 30-40 години, паметам кајчињата на рибарите беа полни, вели рибарот Ѓоко Трајчески.

– Ова е многу значајно, традиционално, секогаш било, едно време и им забрануваа, крстот се фрлаше во раните утринкси часови и обично се подготвуваше рибина чорба. И јас ловев риба порано, со татко ми произведувавме чамци, имаме направено 13 и кога беше дозволено ловевме риба, постојано одевме. Сега нема ловење, нема риба, тогаш преку спортско риболовно друштво си вадевме дозволи и во недела одевме по риба, беше дозволено да се уловат три парчиња, ако е помало парчето од 300-400 грама да го вратиш во вода, вели охриѓанецот Наум Секулоски.

Традицијата да се одбележува овој ден е многу стара, во одреден период престанала да се практикува, но повторно се обновила. Според кажувањата на старите жители на градот, рибарите се капеле на овој ден за да ја покажат нивната приврзаност кон езерото.

Со денешните настани се заокружува одбележувањето на празникот Богојавление Водици во Охрид. Најмасовната црковно-народна манифестација за осветување на езерските води одамна ги надмина локалните и регионални граници, па и годинава имаше бројни посетители од земјава и странство. (Крај)

извор: ИнПрес фото: ИнПрес