Скопје/ Охрид, 26. јануари 2023 (ИНПРЕС) – Македонскиот репрезентативец во текбол, охриѓанецот Димитар Пејчиновски денес ќе ги има првите два натпревари во рамки на Европскиот тур во текбол што се одржува во Скопје.
Во спортскиот центар „Јане Сандански“ негов прв противник ќе биде црногорецот Вељко Љумовиќ, по што ќе следи мечот со Јан Очедалски од Полска.
Охриѓанецот Пејчиновски зад себе има неколку учества на светски првенства, а последното беше во месец декември минатата година во Германија.
Инаку, Европскиот тур во текбол ќе се одржува од 26-ти до 29-ти јануари. Ова е прв текбол турнир за оваа година, воедно и квалификациски за Европските игри во Краков, што се на програмата од 21-ви јуни до 2-ри јули.
Инаку, текбол е вид на спорт што е основан во 2014 година во Унгарија од Габор Борсани, поранешен професионален фудбалер и Виктор Хусар, програмер. Текбол е игра меѓу двајца играчи како сингл, или меѓу три или четири натпреварувачи како игра во двојки и личи на пинг понг.
Ултра популарниот спорт, што зема сѐ поголем замав, се игра на заоблена маса со топка слична на фудбалска, која се префрла со кој било дел од телото освен со рацете.
На меѓународно ниво, играта е претставена од Меѓународната федерација за тегбол (Fédération Internationale de Teqball – FITEQ). Голем број фудбалери од светска класа како Нејмар и Кутињо веќе учествуваа на вакви натпревари. (Крај)
извор: ИнПрес фото: архива
