Охрид, 23. мај 2023 (ИНПРЕС) – Под мотото „Писмото е нашиот универзум“,Владата на Република Македонија организира свечено одбележување на Денот на сесловенските просветители, светите Кирил и Методиј,преку низа настани што денес и утре ќе се одржат во Охрид, центарот на христијанството и просветителството.
– Ги празнуваме ликот и делото на основоположниците на словенската писменост, Кирил и Методиј и нивната непроценлива хуманистичка и космополитска мисија. Овој голем ден се одбележува и слави повеќе од век и половина во словенскиот свет како ден на културата и просветата, соопштија од Владата.
Свеченостите почнуваат вечерва од 20:00 часот во црквата Св.Софија, каде концерт ќе одржи гудачкиот ансамбл „Антео“. Утре во 10:00 часот ќе се одржи панел дискусија на тема „Македонскиот јазик во словенскиот свет“, по што следува во 11:30 часот ќе биде положено цвеќе на споменикот на светите Кирил и Методиј во градскиот парк.
Централната свеченост ќе биде утре напладне на Плаошник, каде ќе се обрати премиерот Димитар Ковачески.
– Нивното дело живее и денес. Македонскиот стандарден јазик, нашиот официјален јазик, денес е целосно заштитен, признат и е рамноправно прифатен меѓу официјалните јазици и во ОН и во Европската Унија и како таков тој е признат и почитуван во светот, на што сме особено горди. Денес, како резултат на тешките, но храбри одлуки кои ги донесовме, вратите се ширум отворени и за активна промоција, но и за развој на македонскиот јазик и култура, напиша на Фејсбук премиерот Ковачевски.
Годинава се одбележуваат 1160 години од словенската писменост како општословенски празник во чест на сесловенските просветители, светите браќа Кирил и Методиј. (Крај)
извор: ИнПрес фото: архива
