Охрид, 7. јули 2023 (ИНПРЕС) – Охридските полуматуранти и годинава позаинтересирани школувањето да го продолжат во стручните училишта отколку во гимназија.
По првото и второто пријавување во трите општински средношколски центри се запишани вкупно 449 ученици.
Сликата од лани почна да се менува, па најмногу деветтоодделенци има запишано во електромашинскиот училишен центар и економското училиште.
Од Општина Охрид за Супер радио и InPress информираа дека во прва година во ОЕМУЦ „Св. Наум Охридски“ досега се запишани 207 ученици, во СОСУ „Св.Кирил и Методиј“ – 151 и во гимназијата „Св. Климент Охридски“ – 91.
Во Регионалниот центар за стручно образование и обука „Ванчо Питошески“ по двете пријавувања во јунскиот рок запишани се 61 ученик.
Местата во некои струки во стручното образование се веќе пополнети. Во ОЕМУЦ „Св. Наум Охридски“ конкурсот е завршен за образовниот профил техничар за индустриска мехатроника на македонски наставен јазик, а во СОСУ „Св. Кирил и Методиј“ местата се исцрпени за образовниот профил техничар за е – трговија и дигитален маркетинг на македонски наставен јазик.
На државно ниво во двете пријавувањa вкупно се запишаа 15.481 ученици од кои: 4.603 ученици во гимназиско образование, 10.277 ученици во стручно образование, 187 во уметничко и 414 ученици во спортска гимназија.
Учениците кои се упатени на поправни испити, испит на година, испити за побрзо напредување, може да се запишат во училиштата во кои има слободни места после јунскиот рок.
Пријавување на учениците ќе се врши на 21-ви август до 24:00 часот. (Крај)
извор: ИнПрес фото: ИнПрес
