Новите американски царини погодија и остров на пингвини што една година не е посетен од луѓе

Перт, 4. април 2025 (ИНПРЕС) – Меѓу чудните и непознати места на кои владата на Доналд Трамп им воведе нови царини се издвојуваат зафрлени антарктички острови населени само со пингвини и фоки.

Островите Херд и Мекдоналд, територија што се наоѓа 4.000 километри југозападно од Австралија, се достапни само со седумдневно патување со брод од Перт и не се посетени од луѓето речиси цела деценија. Но, како и цела Австралија, и Островите Херд и Мекдоналд, Кокосови Острови и Божиќниот Остров сега ќе мора да плаќаат нови царини од 10 отсто.

– Тоа само покажува дека ништо на Земјата не е поштедено од ова, изјави австралискиот премиер Ентони Албаниз.

Херд е пуст, леден и ненаселен остров, главно е покриен со глечери и таму се наоѓа најголемиот и единствен австралиски активен вулкан Биг Бен. Се верува дека последен пат бил посетен од луѓе во 2016, кога група радиоаматери емитувала програма оттаму со дозвола од австралиската влада.

Мајк Кофин од Универзитетот Тасманија неколкупати ги посетил околните води заради научни истражувања.

– Не верувам дека на Херд има нешто за извоз во САД. Таму има само колонии на пингвини, фоки и морски птици, можеби има стотици илјади пингвини. Тоа е редок пример на екосистем недопрен од надворешни растенија и животни и од човечко влијание, кажа Кофин.

Според податоците на Светската банка, во изминатите години од овие острови било извезено само мало количество производи во САД. (Крај)

извор: Сакам да кажам фото: архива