Охрид, 5. мај 2025 (ИНПРЕС) – Постапката за избор на кандидати за градоначалници на есенските локални избори е започната, се прават анкети и анализи, а процесот ќе трае до крајот на јуни, изјави за Супер радио и InPress претседателот на ОО СДСМ Охрид Асен Шајн.
Отворено не прецизира дали ќе се кандидира за прв човек на Охрид, потенцирајќи дека изминатиов период биле фокусирани на реорганизацијата на партијата и консолидација на членството. Сепак истакна дека одлуки ќе се носат заеднички, а изборот ќе падне на кандидат почитуван во градот и од охриѓани и ќе биде нешто најдобро што како партија може да го понудат.
– Во периодот што претстои навистина ќе гледаме да биде избран квалитетен кандидат, почитуван од Охрид и охриѓани, нешто најдобро што ние како партија може да го понудиме,
Од огранокот на партијата во Охрид периодов започнаа со активности и на социјалните мрежи, Шајн вели објавите се критика што доаѓа од самите граѓани.
– Граѓаните бараат ние да бидеме гласниците на тоа што се случува во градот, не може да постои идеалност во поглед на целата работа, но ние во поглед на тоа секојдневно објавуваме и критикуваме бидејќи тоа треба да го правиме како опозиција, вели Шајн.
Во однос на консолидацијата и реорганизацијата на партијата рече дека тоа е природен процес и потребно е време, на почетокот било тешко, но сега се задоволни како се движат работите и во партијата и меѓу самите членови, симпатизери, кои веќе позитивно гледаат на работите. (Крај)
извор: ИнПрес фото: ИнПрес
