Охрид, 2. септември 2025 (ИНПРЕС) – Во новата учебна година во Охрид првпат во училишните клупи седнаа 433 ученици, односно три помалку во однос на лани, а вкупниот број на основци е 4 342.

„Белата чума“ веќе подолг период наназад го прави своето и за жал секоја година во Охрид, но и целата држава имаме сѐ помалку деца во училишните клупи. Па, така во учебната 2023/2024 биле запишани 456 првачиња, бројка за 83 помала во однос на 2022/2023 година кога во Охрид образованието го започнаа 539 првачиња.

Само убави спомени останаа сеќавањата на паралелки со по 33 или повеќе ученици, а градските советници скоро секоја година ги гласаат одлуките за формирање паралелки со помал број ученици од дозволениот минимум. Така беше и годинава, на седница во втората половина на месец јули беше дадена согласност за формирање паралелки со помалку од 20 ученици во основните училишта во Општина Охрид, како и за формирање паралелки со помалку од 25 ученици во ОСУ„Св. Климент Охридски“ во Охрид.

Кога сме кај средните училишта, во трите општински средношколски центри наставата започна за 1 761, додека во РЦСОО „Ванчо Питошески“ за 241 ученик. (Крај)

извор: ИнПрес фото: архива