Охрид, 23. декември 2025 (ИНПРЕС) – Во сабота, 27-ми декември, во спортската сала на ОУ „Христо Узунов“ ќе се одржи првата креативно – уметничка работилница за изработка на ѕвездичките што ќе ги носат дечињата учесници во Бадниковата поворка 2026.
Работилницата ќе започне во 12:00 часот. Ваква работилница, во недела, 28-ми декември, ќе се одржи и во селото Велгошти.
Досега се одржани две проби за Бадниковата поворка, кои поминале во прекрасна атмосфера исполнета со детска радост, смеа и празничен дух.
– Дечињата беа одлични и со секоја проба сè повеќе ја чувствуваат магијата на Бадник. Со нетрпение ја чекаме следната средба, во сабота, исполнети со уште повеќе среќа, радост и празнична топлина, велат од Бадникови поворки Охрид.
Покрај од Охрид, во поворката учествуваат и дечиња од околните села и населени места, како и од Општина Дебрца.
Во насока на негување на традиција на православно празнување на Бадник, со пеење на православни црковни песни, на 6-ти јануари, стотици деца низ охридските улици ќе ја пеат песната „Вечниот Бог“. Учесниците во поворката ќе носат ѕвезди што ја симболизираат ѕвездата деница што го покажала патот на мудреците до пештерата.
Мотото на манифестацијата „Бадникови поворки“ 2026 е „Со Божиќната радост срца да стоплиме!“. (Крај)
извор: ИнПрес фото: архива
