Белград, 27.октомври 2015 (ИНПРЕС) – Српскиот премиер Александар Вучиќ во вторникот во Москва изјавил дека „очигледно на Балканот постојат сѐ поголеми тензии и обиди за севкупна дестабилизација на односите“, пренесуваат српските медиуми.
На маргините на заедничкото заседавање на работните совети на Србија и Русија, српскиот премиер потенцирал дека „некој вложува многу напори“ во дестабилизацијата на западен Балкан и дека тој знае кои се тие сили, ама не сака да каже.
На прашање за тоа на кои сили мисли, Вучиќ рекол дека „мисли оти тоа е доволно очигледо“ и дека „доволно е да се погледне состојбата во опкружувањето, за да сѐ стане целосно јасно“.
„Зошто би говорел за тоа јавно, такво нешто не ми паѓа на памет, доволно е тоа што јас знам и владата што знае и презема чекори околу тоа“, рекол Вучиќ, потенцирајќи дека „некој се обидува тоа да го прошири во Бањалука, Сараево и Белград“.
Српскиот премиер навел дека Србија „ќе стори сѐ за да ги зачува мирот и стабилноста во регионот“, и дека ова и е приоритетна цел.
„Доколку на некој му се потребни мир и стабилност, тогаш Србија тоа ќе може да го обезбеди“, додал српскиот премиер. (Крај)
извор:Макфакс фото:архива
