Серија земјотреси кај Драч, најсилниот од 6,3 степени, почувствуван и во Охрид

Охрид, 26. ноември 2019 (ИНПРЕС) – Серија земјотреси со епицентар во соседна Албанија, од кои најсилниот беше со јачина од 6.3 степени по Рихтер, ги вознемирија жителите во западниот дел на Македонија.

Телеметриската сеизмолошка мрежа на Република Македонија, со станици во Скопје, Валандово, Охрид, Штип и Пехчево, одржувана од Сеизмолошката опсерваторија при Природно-математичкиот факултет во Скопје, рано утринава, на 26.11.2019 година регистрираше серија на земјотреси, чиј епицентри потекнуваат од соседна Република Албанија, од подрачјето на Драч на растојание 170 километри југозападно од Скопје.

Најсилен до сега од оваа серија е земјотресот во 03:54 часот со локална Рихтерова магнитуда 6.3 и беше почувствуван на целата територија на Републиката.

Според досегашните податоци земјотресот е почувствуван со интензитет од V степени според Европската макросеизмичка скала во западните делови на Републиката (Охрид, Струга, Дебар, Гостивар, Тетово), IV-V степени во Скопје, Кичево, Битола и со интензитет од III-IV степени според истата скала во источните делови на Република Македонија.

Послаб земјотрес беше регистриран и утрово во 07:09 часот. (Крај)

извор: ИнПрес фото: архива