Охрид, 3. февруари 2025 (ИНПРЕС) – Охрид е веќе ставен на мапата дестинации на Turkish Airlines, авиокомпанијата ја промовира директната авиолинија Истанбул – Охрид, што ќе започне на 27-ми март.
Ќе се лета во понеделник, четврток, петок и недела со летала од типот Ербас А321, Боинг 737-800 и Б737-900.
Во описот за градов стои дека е популарна туристичка дестинација на Балканот, македонски бисер и дел од светското културно наследство на УНЕСКО.
– Познат по Охридското Езеро, Охрид поседува и историска текстура која го спојува неговото античко културно наследство со современи елементи, пишува на веб страната на Turkish Airlines.
Покрај тоа наведени се најатрактивните места за посета, дел од храната што треба да се проба, како и сервисни информации за градот.
Билетите се пуштени во продажба и веќе има голем интерес кај дијаспората, се купуваат авионски карти до Охрид од Торонто, Њујорк, Вашингтон или Сиднеј.
Директната линија што ќе ги поврзува Охрид и Истанбул е воведена по првиот повик на македонското министерство за транспорт за воведување нови авионски линии што ќе бидат субвенционирани.
Гостите од Турција традиционално се најбројни меѓу странските туристи во нашата држава. Според последните официјални податоци на Државниот завод за статистика, во ноември 2024 година Република Македонија ја посетиле 14.193, а лани во јули таа бројка изнесуваше 53.296 гости од Турција. (Крај)
извор: ИнПрес фото: архива
