Охрид, 11. декември 2025 (ИНПРЕС) – Оваа сабота, 13-ти декември, започнуваат подготовките за Бадниковата поворка 2026 во Охрид.
Пробите ќе се одржуваат секоја сабота во 12:00 часот во спортската сала на ООУ „Христо Узунов“. Сите заинтересирани кои сакаат да учестуваат на поворката подетални информации можат да добијат на телефонскиот број 078/271-793.
Покрај од Охрид, во поворката учествуваат и дечиња од околните села и населени места, како и од Општина Дебрца. Па така децата од Велгошти во недела, 14-ти декември, ќе ја имаат првата проба во манастирот Св. Петка, со почеток во 18:00 часот.
Во насока на негување на традиција на православно празнување на Бадник, со пеење на православни црковни песни, на 6-ти јануари, стотици деца низ охридските улици ќе ја пеат песната „Вечниот Бог“. Учесниците во поворката ќе носат ѕвезди што ја симболизираат ѕвездата деница што го покажала патот на мудреците до пештерата.
Мотото на манифестацијата „Бадникови поворки“ 2026 е „Со Божиќната радост срца да стоплиме!“. (Крај)
извор: ИнПрес фото: архива
