Скопје, 28. февруари 2025 (ИНПРЕС) – Граѓаните во иднина ќе можат да добијат електронско уверение за состојбата на остварениот доход, документ кој им е потребен за остварување на стипендија, за засновање на работен однос, за социјална помош, за прием во социјална установа, па дури и кога се работи за посвојување на дете.
Директорката на УЈП, Елена Петрова, дополни и дека ова електронско уверение ќе го прифаќаат и банките при одобрување на кредит, бидејќи институцијата е надлежна за прибирање на сите податоци за платите и другите примања, не само на вработените, туку и на хонорарците и фриленсерите.
– Ова е целосно бесконтактна услуга, заснована на вмрежување и размена на податоци меѓу системите во реално време, а резултатот е електронски документ кој ги исполнува сите стандарди – соопшти Петрова на брифинг со новинарите.
Услугата е достапна за сите граѓаните, вклучително и за странските лица, кои се регистрирани корисници на системот е-Даночни услуги (моменталната бројка е над 900 илјади лица). Во најголем дел од случаите услугата е ослободена од административна такса, а за определени цели се наплаќаат 100 денари, но процесот за плаќање е целосно интегриран во автоматската процедура.
– Оваа услуга досега траеше најмалку два часа, а сега ќе ослободи за други работни задачи околу триесетина вработени во УЈП. Просечниот број на издадени уверенија на шалтер на годишно ниво е околу 30.000 и за неа се трошеа 62.000 работни часа годишно – истакна Петрова. (Крај)
извор: Слободен печат фото: архива
