Охрид, 7. мај 2025 (ИНПРЕС) – Околу 500 учесници, средношколци и граѓани, беа дел од хуманитарната трка „Од срце трчај, со срце дарувај за Кочани” што се одржа денес во Охрид.
Трката беше во должина од три километри, од почетокот на кејот пред „Харбор“ до „Куба Либре“. Учесниците трчаа во знак на поддршка на семејствата на жртвите од пожарот во дискотеката „Пулс“ во Кочани.
Меѓу учениците во машка конкуренција прв беше Петар Милески, втор Андреј Симоноски, а трет Ален Малик. Во женска конкуренција Лина Луканова беше прва, Сара Секулоска втора и Сара Цикуш трета.
Кај возрасните, кај мажите најдобар беше Александар Здравески, Александар Булески втор и Димитар Велјаноски трет. Кај дамите трката прва ја заврши Александра Маленко, втора беше Росана Пендик и трета Соња Стаматоска.
Додека траеше трката, по должината на кеј „Македонија“ беа поставени кутии за донации, а беа повикани сите хумани граѓани колку се во можност да се приклучат и со свој придонес да покажат сочувство и поддршка на семејствата во овие тешки моменти.
Хуманитарната трка беше во организација на СОСУ „Св. Кирил и Методиј”, поддржана од ЈП „Билјанини извори“. (Крај)
извор: ИнПрес фото: ИнПрес
