Охрид, 7. септември 2023 (ИНПРЕС) – И овој септември, активистот Жанко ЗШ Голабоски и комплетната екипа на охридското Супер радио даваат силна поддршка за лицата со Мултипла склероза (МС).
Жанко најави планински искачувања и дарувања крв во знак на поддршка.
– Секој миг, секој час, секој ден е вистинско време за подигнување на општата свест за мултипла склерозата. Ние се бориме, но со помош на пријателите сме непобедливи. Ги искачуваме врвовите за лицата кои се борат со оваа болест. Да ја подигнеме јавната свест за МС, вели Голабоски.
Супер радио минатата година беше дел од екипата која го адаптираше видеото „Мојата мајка има МС“ на македонски и албански јазик за предизвиците и справувањето со МС. Во рамки на четвртата сезона од националната кампања „Ги запознаваме ретките болести”, благодарение на добрата соработка со Национално здружение за МС – National association for MS ја обработивме Мултипла склерозата кај детската популација.
Инаку Националното здружение за помош и поддршка на лица со мултипла склероза четврта година по ред ја спроведува кампањата Септември – месец за подигнување на свеста за мултипла склероза.
Оваа кампања има за цел преку физичката активност (пешачење, искачување планини, возење велосипед и други активности) да ги анимира лицата со МС и нашите поддржувачи за да се подигне свеста за МС, односно пошироката популација да се запознае со оваа состојба, како и со потребите и предизвиците со кои се соочуваат лицата кои боледуваат од МС. (Крај)
извор: ИнПрес фото: ИнПрес
