Охрид, 29. април 2026 (ИНПРЕС) – Под мотото „Да живееме едни со други, а не едни покрај други“ денес напладне во дворот на гимназијата „Св. Климент Охридски“ ќе се одржи голем мултикултурен настан и отворен ден.
– Ќе ви ја пренесеме силната порака дека со почитување на различностите ќе изградиме една средина на меѓусебна соработка и мултикултурно богатство. Во пријатна и динамична атмосфера учениците и професорите ќе претстават програма исполнета со креативност, знаење и заедништво, велат од училиштето.
Воедно овој настан ќе биде и Отворен ден на Гимназијата каде посетителите ќе можат да се запознаат со наставниот процес, работата и функционирањето на училиштето. Додаваат дека ќе се слуша музика и ќе се пеат песни на повеќе јазици, а уметничките и едукативните активности ќе бидат застапени преку цртање, сликање, јазични игри, научни експерименти и интерактивни содржини од различни области.
– Настанот ќе понуди и креативни изработки инспирирани од математиката, физиката и хемијата, запознавање со историски личности, филозофски мисли, како и можност за „патување“ низ различни култури и образовни искуства, вклучително и програмата Еразмус+. Сето тоа е одраз на знаењата и вештините кои учениците ги стекнуваат во текот на наставата. Учениците и професорите посветено работат цела година за да подготват интересни и оригинални содржини, преку кои секој актив ќе се претстави на најдобар можен начин, потенцираат од гимназијата.
Овој настан ќе биде можност за претставување пред идните ученици, нивните родители и пошироката јавност, но и најава за продолжување на кампањата „Отворени врати на Гимназијата“ во месец мај. (Крај)
извор: ИнПрес фото: ИнПрес
