Самарас го отфрли барањето за предвремени избори

Атина, 4. ноември 2014 (ИНПРЕС) – Грчкиот премиер Андонис Самарас ги отфрли повиците на лидерот на Сириза, Алексис Ципрас за предвремени избори, обвинувајќи го шефот на опозицијата дека прави „обид да ја дестабилизира земјата“.

Според Самарас, станува збор за обид да се дестабилизира земјата во момент во кој се гледаат првите знаци на закрепнување. Во исто време премиерот изрази верување дека парламентот ќе избере претседател веќе на почетокот на следната година.

– Ципрас повторно сака предвремени избори, токму она што грчкиот народ не го сака и она од што стравува меѓународниот фактор, рече Самарас по состанокот со претседателот Каролос Папуљас, кој претходно разговараше и со Ципрас.

– Повторувам дека нема да има предвремени избори, рече Самарас, додавајќи дека е „длабоко убеден“ дека пратениците ќе изберат претседател по истекот на мандатот на Папуљас во март. „Стигнавме далеку, премногу далеку за да се враќаме назад“, истакна грчкиот премиер.

По изјавата на Самарас, Сириза излезе со критики и обвинувања дека тој „не сака да се постигне консензус“. (Крај)

извор: АФП фото: АП