Охрид, 13. август 2025 (ИНПРЕС) – Музиката, културата и туризмот и годинава ќе се обединат на едно место, на летната сцена „Долни Сарај“ во преубавиот Охрид, каде на 29-ти и 30-ти август ќе се одржи 32. издание на фестивалот „Охрид фест – Охридски трубадури“.
Од управата на фестивалот информираат дека влезот за двете фестивалски вечери ќе биде слободен
– „Охрид фест“ не е само музички настан, туку и платформа за млади таленти и признание за големите имиња, но и силна алатка за промоција на Охрид и македонскиот туризам, вели првиот човек на фестивалот Григор Копров.
Фолк вечерта е на 29-ти август, а на 30-ти е интернационалната вечер. И годинава ќе учествуваат познати имиња од домашната и балканската фолк и поп сцена. Легендарниот Оливер Мандиќ ќе биде специјален гостин и ќе прими награда за безвременски хит, а таква награда ќе добие и Сашо Гигов – Гиш за „Самовилска свадба“. Менаџерот Рака Мариќ, кој има организирано многу концерти на регионални и светски ѕвезди, ќе добие награда за особен менаџерски придонес во популарната музика. (Крај)
извор: ИнПрес фото: архива
