Скопје, 13. август 2025 (ИНПРЕС) – Ивона Јо го претстави својот најличен и најмоќен проект досега „Молитва“, песна создадена во еден здив.

Ова не е само музичко издание, туку искрена духовна и емотивна катарза, огледало на внатрешната борба, болка и победа над најтешкиот противник: самите себе. Текстот, музиката, аранжманот, како и режијата на видеото се на Темелко Андреев.

„Молитва“ е автобиографска исповед, но и универзална приказна за сите кои некогаш биле заробени во мрежата на негативните коментари, осуди и сомнежи. Во основата на песната пулсира моќна Христова порака, повик за простување, не само кон другите, туку и кон себеси. Преку текстот, Ивона ја отвора вратата кон ослободување од „старите верзии“ на нас самите, слабите, повредените и несигурните, кои љубоморно се обидуваат да нè задржат во минатото.

Со „Молитва“, Ивона Јо не само што ја споделува својата приказна, туку создава и инспиративен повик за сите кои се подготвени да го водат најважниот дуел, оној со сопствените стравови и сомнежи, затоа што вистинската победа започнува внатре во нас. (Крај)

извор: ИнПрес фото: архива