Охрид, 10. јуни 2025 (ИНПРЕС) – Академијата за роботика и иновации утре во Охрид ќе ја одржи финалната презентација на едукативниот прирачник и онлајн курсеви за наставници и тренери „Улогата на образованието и наставниците во решавање на проблемите на животната средина“.
Овој прирачник, создаден како дел од Еразмус+ проектот „No other world“ е наменет за наставници од основни и средни училишта и служи како практична алатка за интегрирање на еколошки теми во наставата.
– Заедно со печатениот прирачник, подготвени се онлајн курсеви со визуелно атрактивни слајдови, говори за предавање и веднаш применливи активности кои им помагаат на наставниците да ги пренесат овие важни теми на учениците – интерактивно, креативно и без потреба од дополнителна подготовка. Онлајн курсевите ги покриваат клучните аспекти од еколошкото образование. Главниот фокус на нашиот проект беа глобалните еколошки проблеми, предлог на практични решенија и нивна реализација, преку вметнување во образовниот процес. Сметаме дека ова е универзален проблем и треба да се реши во соработка со повеќе институции ширум светот, информираат организаторите.
Прирачникот и курсевите се создадени од наставници – за наставници, со цел да поттикнат генерации млади луѓе кои ќе се грижат, разбираат и делуваат во заштита на природата.
Презентацијата ќе се одржи во хотелот „Охридати Палас“ со почеток во 11:00 часот. (Крај)
извор: ИнПрес фото: архива
