Охрид, 18. јули 2025 (ИНПРЕС) – Продолжен е рокот за аплицирање по јавниот повик за ангажирање на невработени лица за заштита и превенција од пожари и заштита и оплеменување на животната средина.
Од охридскиот Центар за вработување за Супер радио и InPress информираа дека досега се пријавени 14 лица од Охрид.
Повикот предвидува работно ангажирање на 10 невработени лица, а новиот краен рок за пријавување е 23-ти јули.
Работното ангажирање на невработените лица ќе биде реализирано за период до најмногу 5 (пет) месеци. За кандидатите што ќе бидат избрани и работно ангажирани се предвидува да им биде исплатен месечен износ од 24.000 денари со вклучено осигурување за инвалидност и телесно оштетување причинето со повреда на работа и професионална болест и данок на личен доход.
Изборот на кандидати ќе го спроведе општината во соработка со Дирекцијата за заштита и спасување (ДЗС) и Противпожарен сојуз на Македонија. Кандидатите се должни да учествуваат на обука организирана од Противпожарниот сојуз на Македонија за користење противпожарна опрема и стекнување на вештини за справување и превенција од пожари. (Крај)
извор: ИнПрес фото: архива
