Охрид, 3. јули 2025 (ИНПРЕС) – Минатиот викенд, на неколку локации во Национален парк Галичица, се одржа значаен едукативно-координативен собир за планинско спасување, на кој учествуваа претставници од речиси сите организации членки на Националниот сојуз за планинско спасување.
Фокусот на собирот беше усогласување на стандардите за имобилизација и транспорт на повредени лица на нетехнички планински терен, во согласност со препораките на ICAR – Меѓународната комисија за алпско спасување. Со оваа активност започнува важен двегодишен процес за адаптација на националните стандарди според меѓународните практики, сертификација на спасувачите и примена на современа опрема и техники за ефикасно и безбедно изведување на спасувачките операции.
Учествуваа спасувачи и претставници од Охрид, Скопје, Струмица, Штип, Кочани, Велес, Тетово и Вевчани, како и официјални претставници од Македонската алпинистичка федерација (МАФ) и Македонската асоцијација за интернационални водичи во планина (МАИВП).
Иако чекорите кон унапредување се јасни и силни, и понатаму останува отворено прашањето за институционална поддршка од страна на државата. Интензивно се работи на изнаоѓање соодветно решение, во согласност со европските практики, за конечно воспоставување на функционална и ефикасна Планинска спасителна служба на национално ниво.
На семинарот беше формализирана соработката помеѓу Националниот сојуз за планинско спасување (НСПС), МАФ и МАИВП, преку потпишување на договор за стратешко партнерство. Со тоа, трите организации се обврзаа на заедничка работа за унапредување на спасувањето и безбедноста во авантуристичкиот туризам и планинските спортови.
Домаќин на настанот беше Алпинистички клуб „Патагонија“ – Охрид, во соработка со Планинската спасителна Сслужба при Црвен крст Охрид, а активноста беше финансиски поддржана од Државна видеолотарија на Македонија и Casinos Austria. (Крај)
извор: ИнПрес фото: архива
