Охрид, 4. ноември 2025 (ИНПРЕС) – Во охридскиот Центар за јавно здравје продолжува бесплатната вакцинација против сезонски грип за ризичните групи граѓани за што има голем интерес.

Од 16-ти октомври кога започна имунизацијата на оваа група граѓани досега се дадени 3.005 вакцини, информира за Супер радио и InPress специјалист епидемиолог д-р Јованка Стурлакова Коровешоска.

– Најмногу се вакцинираат лица на возраст над 65 години и лица со хронични заболувања што беше и очекувано. Годинава споредено со лани има околу 200 лица повеќе пријавени. Секоја година Охрид има голем интерес за вакцинација против сезонскиот грип, потенцира д-р. Стурлакова Коровешоска.

Покрај имунизацијата на ризичните групи граѓани се очекува деновиве да започне вакцинација и на останатите граѓани со комерцијални вакцини. Цената ќе биде 700 денари, а за примање не е потребно претходно закажување.

Досега во општините што ги покрива охрискиот Центар за јавно здравје – Охрид, Струга Дебар, нема пријавени случаи на заболени од грип.

Д-р. Стурлакова Коровешоска истакна дека благодарение на тоа што луѓето се вакцинираат превенцијата е поголема, се спречува појавата на потешки форми и придонесува помалку работа да имаат интернистите и инфектолозите. (Крај)

извор: ИнПрес фото: ИнПрес/архива