Скопје/Приштина, 22. мај 2015 (ИНПРЕС) – Роднините на убиените вчера попладне пристигнаа во Скопје со полициско обезбедување и комбиња што им служеа за транспорт. Трошоците за транспорт ги покриваат семејствата.

Во Косово ќе биде направена нова обдукција врз телата на деветтемина убиени косовски Албанци, припадници на вооружената криминално-терористичка група која пукаше врз полицијата во Куманово. Телата, рано утрово, во придружба на нивните роднини, беа префрлени во Приштина. Роднините ги презедоа телата на убиените од градските гробишта „Бутел“ во Скопје.

Директорот на косовската судска медицина, Арсим Грџали, изјавил дека обдукцијата ќе биде направена по разговорите со роднините на убиените. Датумот на нивниот погреб дополнително ќе биде соопштен, откако ќе биде завршена аутопсијата, пренесуваат косовските медиуми.

Роднините на убиените вчера попладне пристигнаа во Скопје со полициско обезбедување и комбиња што им служеа за транспорт. Трошоците за транспорт ги покриваат семејствата, нивни претставници или претставници на косовските власти.

Министерството за надворешни работи на Македонија ја информира Амбасадата на Косово во Македонија дека веќе е извршена обдукција и идентификација на загинатите припадници на терористичката група во Куманово.

Во полициската акција од деветти и десетти мај, во Дива населба во Куманово загинаа 10 припадници на терористичката група, потврдија од Oбвинителството. Девет се од Косово, и еден е од Македонија.

– При увидот на самото место, пронајдени се десет трупа, за кои по извршената обдукција се утврдило дека припаѓаат на терористичката група, стои во официјалното соопштение на Обвинителството. (Крај)

извор: Телеграф.мк фото: архива