Белград, 4. јуни 2015 (ИНПРЕС) – Политичката ситуација во Македонија била едно од прашањата за кои српскиот премиер Александар Вучиќ разговарал со советникот на американскиот претседател за национална безбедност Сузан Рајс.

Како што пренесе Македонската телевизија, Вучиќ рекол дека Србија не сака да се меша во внатрешните работи на Македонија и дека е горд што Србија на никаков начин не влијаела на кризата.

– Многу кратко разговаравме. Јас кажав дека сум многу задоволен и горд на фактот дека Србија на никаков начин не влијаеше за создавање или продлабочување на кризата во Македонија. Ја сметаме Македонија за наш пријателски сосед и секогаш ќе имаме таков однос. На никој начин не сакаме да се мешаме во внатрешните работи на Македонија. Јас мислам дека тоа е еден фер, коректен и многу чесен пристап. Имавме таков во Белград и овде исто во Вашингтон, изјави Вучиќ по средбата со Сузан Рајс.

На Капитол Хил, српскиот премиер се сретна и со претседавачот со Сенатскиот одбор за оружените сили, сенаторот Џон Мекејн. Во Вашингтон, Вучиќ треба да се сретне и со помошникот државен секретар Викторија Нуланд, како и со европскиот комесар за проширување Јоханес Хан, кој е во посета на САД. (Крај)

извор: Плус Инфо фото: архива