Охрид, 26. март 2026 (ИНПРЕС) – Автомобили на тротоар и велосипедска патека – паркирани или со вклучени четири трепкачи, ваква е секојдневната слика долж улицата „Питу Гули“ во Охрид.
Читатели на InPress до редакцијата испратија фотографии како потврда, велат за да се стигне од еден до друг крај на улицата повеќе одиме по коловоз отколку по тротоар, проблем е и поминувањето со детска количка. Со затоплувањето на времето дополнително ќе треба да внимаваме и на скутерите оставени на тротоар.
Вакви состојби има и на други локации низ градот, но оние кои секојдневно ја користат оваа улица сметаат дека тука состојбата е значително сериозна поради населеноста, бројните деловни субјекти, големата фрекфенција на луѓе и возила.
Граѓаните бараат почитување на сите постоечки законски регулативи и истите да важат подеднакво за сите, почести контроли на надлежните и подигнување на сообраќајната култура. Човечкиот фактор е еден од клучните елементи кои влијаат на нивото на безбедност во сообраќајот.
Од скоро системот „Безбеден град“ значително придонесе за подобрување на почитување на сообраќајните правила и прописи и подигнување на нивото на сообраќајна култура. Пред почеток на сезоната најавено е да почне да функционира и во Охрид, а акцент ќе биде ставен на местата каде што се забележува брзо и хаотично возење или непрописно паркирање.
Процесот на промена на навиките и културата на однесување во сообраќајот е бавен, но затоа секој од нас преку личен пример треба да придонесе за побезбеден сообраќај. (Крај)
извор: ИнПрес фото: ИнПрес
