Охрид, 18. мај 2026 (ИНПРЕС) – Завршни подготовки пред годинашната матурска парада,што ќе се одржи во четврток, 21 мај, точно напладне, на Градскиот плоштад „Свети Климент Охридски“ во Охрид.
На овој, веќе традиционален настан ќе учествуваат околу 350 матуранти од сите охридски средни училишта кои ќе го изведат танцот „Квадрил” од Штраусовата опера „Лилјакот”.
И годинава за подготовките и сé да изгледа онака како што доликува се грижи професорката м-р Катерина Стојаноска.
– Подготовките се во завршна фаза, обучени се сите матуранти. Овој настан го симболизира преминот од средно образование кон нови животни предизвици и испраќа порака за мир и толеранција, изјави неодамна за OhridPress и Супер радио професорката Стојаноска.
Заедно со нашите матурани, во исто време ќе танцуваат и нивните врсници од неколку македонски градови, но и од градови во Европа.
„Квадрил” е класичен танц што потекнува од 18. век и се изведува во четири слики: панталон, ете, пасторел и финале.
Матурската парада е покрената во 2001 година во Словенија, а нејзин идеен творец е Томаж Амброж од танцовата школа „Уршка” во Љубљана. (Крај)
извор: ИнПрес фото: ИнПрес
