Охрид, 29. август 2023 (ИНПРЕС) – Општина Охрид нема изготвено автоматизирана електронска евиденција на улици, па моментално евентуално носење одлука за промена на име на некоја улица не ќе може да се реализира.
Ова е одговорот на Советот на Општина Охрид и соодветните служби, изнесен на денешната седница, а по неодамнешната иницијатива на независниот советник во охридскиот Градски совет Антонио Наумоски за именување на три улици без уличен систем во градот.
Иницијативата била разгледана со службите, но поради немањето, регистар не можат да се направат промените.
– Иницијатаивата е разгледана со службите на општината, не е спорно ниту предлозите, ниту имињата, но за жал општината сѐ уште нема изготвено автоматизирана електронска евиденција на пропишан законски образец, ниту истата е доставена до Централниот регистар на Република Македонија, рече претседателот на Советот, Сашо Донев.
– Проблематично е ако во моментов преистапиме кон донесување на одлука за промена на имиња на улици. Одлуката нема да може да се реализира. Ние како општина мора прво да пристапиме кон изработка на тој регистар, па да пристапиме кон донесување на вакви одлуки, појасни секретарот на Општина Охрид, Александар Китески.
Претседателот на Советот ги задолжи службите да се изготви изготви регистарот, да се вметнат улиците чии имиња претходно се промениле и понатаму согалсну одлуки да се прават и други промени.
Советникот Наумоски побара одредена временска рамка за изготвување на регистарот, на што му беше одговорено дека би бил готов до крај на оваа година.
Инаку, во иницијативата, советникот Наумоски даде три предлози за именување улици без уличен систем. Тој предложи улицата број 130 да биде именувана во чест на македонскиот политички водач, војвода и еден од водачите ВМРО – Тодор Александров, предлог број 2 е улица без уличен систем да биде именувана во чест на поранешниот Градоначалник Проф. д-р Јован Стојаноски и третиот предлог е именување на улица во чест на нашиот сограѓанин и учесник во Македонското ревулуционерно движење и член на Гемиџиите – Марко Бошнаков. (Крај)
извор: ИнПрес фото: архива
