Ракометен спектакл оваа сабота во Охрид

Охрид, 14. февруари 2023 (ИНПРЕС) – Вистински спектакл оваа сабота ги очекува љубителите на ракометот во Охрид.

Во второто коло од плеј-офот во Супер лигата, во Охрид гостува актуелниот шампион Вардар, што воедно е премиерен натпревар на домашен терен во новата полусезона. „Гладијаторите“ најавуваат беспоштедна борба на секоја педа од теренот и очекуваат полна сала.

– На шампионот не му се упатуваат закани, но се надеваме на одличен натпревар во кој ќе дадеме се од себе да останеме непоразени на свој терен. Ги повикувам навивачите да дојдат во што поголем број, вели чуварот на мрежата Александар Миленковиќ.

На почетокот на месецов од навивачката група „Рибари“ најавија дека се враќаат на натпреварите на ГРК Охрид, а спектакл најавија токму за овој меч.

Натпреварот ќе се игра во салата „Билјанини извори“ со почеток во 18.30 часот.

„Гладијаторите“ на стартот од разигрувањето за титулата и местата кои водат во Европа во гости ја совладаа екипата на Еурофарм Пелистер 2. (Крај)

извор: ИнПрес фото: архива